Анир чимээгүйг хамгийн сайхан хөгжим гэж нэрийдээд
Алгаа тосоод тэнгэрээс хур гуйдаг
Алхам тутамд ардаас чирэгдэх өчигдрийн дурсамжаа санагалзаад
Ахиад нэг, ахиад нэг саначихаад л гээд санаа алддаг тэр л охинд
Дуу шиг учрал, шүлэг шиг хагацал
Дундуур бүхнээ чиний харцаар дүүргэчихсэн
Чихээ таглаад, нүдээ аниад чиний дэргэдүүр чив чимээгүй өнгөрчихдөг ч
Чин зүрхэндээ "баяртай" гэж хэлж зүрхэлдэггүй тэр л охинд
Тэр саранд, тэртээх оддод
Туранхай цээжин дэх хөндүүр бүхнээ шивнэчихдэг тэр л охинд
Аз жаргал гэдэг чи юм, чиний нүд юм гээд
Аяархан шивнээд шувуудын далавчинд амжиж дайгаад явуулчихдаг тэр л охинд
Хүлээлт гэдэг тэсвэр юм, тэвчээр юм
Хүрэх хязгаар нь харин чи юм гээд
Хөндүүр зүрхнийхээ үнэн бүхнийг өчөөрэй
Худал бүү хэлээрэй
Худал л бүү хэлээрэй
Хүлээсээр бэтгэрсэн
Хүрэн цээжтэй тэр л охинд.....
2014.08.01
Б.Номиндалай
No comments:
Post a Comment